|
Ogen dicht un dör
Elkeen kennt seker de kört Werbefilms in ´t tweede Feernsehprogramm, in de sük Schauspölers mit twee Fingers een Oog dichthollen un dat Spröökje `mit dat tweede sücht man beter´ van sük geven.
Daarbi is mi upfallen, dat dat Woord `Oog´ in mennig anner Spröökjes inthollen is. Hier blot ´n paar Bispölen:
Oog um Oog, Tann um Tann. Dat musst in ´t Oog hollen. De hett en Oog up di smeten. Dat Oog ett mit. Oog will mehr as Mund kann. Dat harr ok in ´t Oog gahn kunnt. Nehm man noch en Oog vull. Nu slaap man, dat een Oog de anner neet sücht.
Wi mutten en Veerogengespreck föhren. Hen un her mutt man ok maal en Oog todrücken.
Wenn een de beid Spröökjes mit `en Oog todrücken´ of `mit de tweede sücht man beter´ Woord för Woord nehmen sull, kummt aver mennigeen in de Bredullje.
So as mien oll Fründ Karl. De hett blot een gesund Oog un hett daarher nooit lehrt mit twee Ogen to sehn. Dat is wiss nix, waarum he nu beduurt worden will of mutt, he kennt dat ja neet anners. He is daarmit de leste sövenunsesstig Jahr allerbest dör de Tied komen.
Dat bedüddde natürelk, dat he up dat good Oog besünners uppassen muss. Butendeem wurr he all een bit twee Jahr up grau Star unnersöcht un ok of de Netthuud amenn al Schaa leden harr. Keen mooi Unnersöken aver wat mutt dat mutt.
Wiel daarbi glückelkerwies nooit wat funnen worden was, harr he en heel lang Sett neet mehr an de Ogendokter docht. Dat wull he flink nahalen, man en Termin to kriegen was unmögelk. Siet over twee Jahr stunn he nu up ´n Wartelist, man daar geböhrde nix.
Körtens is he direkt in de Praxis vörstellig worden un hett maal nafraagt an welke Stee he up de List stunn. Wennehr he denn ennelk an de Rieg was, wull he weten, un of he dat overhoopt enes Daags noch beleven dee. Man de frünnelk Damen bi de Anmelden moken hum daar keen Hoop. För en normaal Unnersöken hett de eenzig verbleven Dokter keen Tied, de is mit Operationen un Noodfallen kumpleet utlast.
Dat heet: keen Beswaren, keen Termin! Karl wurr raden sük lever na en anner Ogendokter umtokieken. Ok sien Inwennst, dat he siet fievtig Jahr Patient in disse Praxis is, un sien hele Krankengeschicht daar dokumenteert is, hett hum neet wiederhulpen. Un en neei Dokter to finnen, dat weten wi all, is wahrschienelk stuurder as in ´t Lotto to winnen.
Daarum hett Karl later nochmaal en neei Anloop nohmen un angeven, dat he mitunner Steerntjes tinkeln sach. Dat is wall as Beswaar dörgahn. De Dokter hett hum örnlik unnersöcht un faststellt, dat mit sien Oog noch alls up Stee was. Man mit de Steerntjes, daar stunn he, ehrelk geseggt, noch vör ´n Raadsel, man dat wull he nu in ´t Oog hollen.
Karl was tofree un bedankde sük för de Unnersöken, de för hum so leep van Bedüden was. Dat he de tinkelden Steerntjes alltied blot in d´ Nachthimmel sehn harr, dat harr he wall vergeten to seggen.
Karlheinz Harms
für den 03.09.2026
|
