|
Wat en Gedicht! Wat? En Gedicht!15.10.2026
Annerlessens hebb ik in de Kiekkast en Quizsenden sehn. De Kandidaat wuss up en Fraag de Antwoord neet. He kennde wall de Zauberlehrling neet. En Ballade van 14 Strophen ut Goethe sien Feer was wall tovööl för hum. Ik kunn hören, wo de Düütskmesters tohuus an de Kiekkasten in Ohnmacht fallen deden.
Achteran hebb ik mit verscheden Lüü över Balladen, Gedichten, Lyrik proot. Un weten ji wat? Bi dat Thema gifft dat blot twee Koppels! De een Sied fangt futt an un seggt de Glocke van Schiller up! Teihn Strophen. Buten Kopp. Achteran noch John Maynard van Theodor Fontane. Denn dat Wiehnachtsgedicht Knecht Ruprecht van Theodor Storm. Herr von Ribbeck auf Ribbeck im Havelland hebb ik vergeten! Weer en Ballade van Theodor Fontane. Ok en bietje Plattdüütsk daar mit bi. De Strophen kennen ji ja seker ok. Well van jo seggt Herr von Ribbeck nu nettakkraat in Gedanken up? Ik weet, well nu an de Kökentafel sitt un smüüstern mutt.
Dat gifft Leevhebbers van Spraak. De föhlen Spraak, de amen Spraak. Hör fallt dat licht, buten Kopp to lehren. Se hebben Vermaak an Spraak! Dat sünd faken ok de Lüü, de geern singen. De all Leder ut dat Radio mitsingen könen of in en Chor unnerwegens sünd. Meesttieden fallt hör dat ok licht, anner Spraken to lehren.
Un denn gifft dat de tweede Koppel. De Lüü seggen smaals: „Bliev mi of mit Gedichten! Wat sük riemt, dat geiht noch nettakkraat, man mehr verdraag ik neet. Ja, un ok Riemsels finn ik ollerweltsk. Wat sall dat noch, Gedichten buten Kopp to lehren? Vandaag fraag ik lever KI. De weet dat all un verklaart mi ‘t in en Wuppdi. Gedichten upseggen? Ik laat mi Texten vörlesen. Mien Reekner un mien Mobieltje övernehmen dat för mi. Tied för Gedichten hebb ik neet.“
So is dat. Dat is up Stee so. Elk hett Grapp an wat anners.
To welke Koppel hören ji? Mögen ji Gedichten? Könen ji welken upseggen? Hebben ji villicht en leevste Gedicht? Ik hebb sogaar twee. Een is „Berlijn“ van Kasper Peters, de ut de Kuntrei van Groningen stammt. Dat Gedicht is up Nederlands schreven, man dat gifft ok en Överdragen „Berlin“ in dat Düütske. Dat anner Gedicht is van Gerd Constapel un heet „Winterdaags“. Up Plattdüütsk schreven, hett Constapel ‘t achteran as „An Wintertagen“ so överdragen, dat de Neet-Oostfresen dit Gedicht ok verstahn könen.
En Gedicht is en Gedicht is en Gedicht. För mi.
Antje Lübben
|
