|
Heia Safari
Wenn Schoolkinner Sömmerfeerjen hebben un Mama un Papa noch keen Urlaub kriegen, dann springen Oma un Opa of un to maal in un mutten för Tiedverdriev un Kinnerbelüstigung sörgen.
So harr mien Frau körtens de Idee, mit twee van uns Kindskinner in de Serengeti Park na Hodenhagen to fahren. Daar wullen wi ok over Nacht blieven un binnen de Park in en Telt slapen. En grote Telt, of neeimoodsk ok “Lodge“ nöömt, harr se al utkeken. Sükse Lodges
sünd kumpleet utstaffeert mit Köken, Baadkamer, Slaapkamers mit normaal Bedden un nütelk Butzen för Kinner.
Mit de Vörslag was ik inverstahn, ik harr blot een Bedingung: Wenn wi daar mit de Kinner en Safari-Tour dör de Derengehegen maken, dann blot in en Dübbeldecker-Bus un
nooit neet mit uns egen Auto.
Ik wull ja neet, dat uns dat laterhen so geiht as Klaas Meier ut Lögensdörp. Of de sien Geschicht sük domaals würkelk so todragen hett weet ik neet, man de sall mit sien Famielje in sien nagelneei Auto dör so ´n Derenpark fahren wesen.
Vördeem sall he sien Kinner aver noch düchtig wahrschaut hebben, dat de Siedenfensters van ´t Auto dichtblieven mussen.
Man as Kinner so sünd, wenn ´t hör to langwielig word: Schiev rup, Schiev runner, en bietje mit de Slickerpüüt rascheln un unversehns harr en neeisgierig Elefantendaam hör Rüssel dör ´t open Fenster in ´t Auto schoven. Meiers Dochter kreeg Nood un dreihde de Schiev fell na boven. De Elefantendaam verfehrde sük noch mehr as dat Wicht, truck hör inklemmt Rüssel weer torügg un schüppde heel vergrellt tweemaal tegen de Autodöör.
Dat Klaas daarna noch enig Apen up ´t Auto sprungen sünd, de Antenn ofknickt un de Schievenwiskers verbogen harren, hett hum de Rest geven un he is mit düll Kopp un sünner een Woord to seggen weer na Huus fahren.
Kört vör Lögensdörp wurr he dann tofällig bi ´n Polizeikuntroll anhollen. Een van de Schandarms froog hum na de dicke Bulen in de Döör. Klaas kreeg en hoogrode Kopp un wull weten wat disse Fraag denn sull. Elkeen kunn doch sogaar sünner Brill sehn, dat daar ´n utwussen Elefant tegenschüppt harr. Dat funn de Polizist nu heel neet lüstig. Klaas sull so tomaal utstiegen un to sien Verdreet ok noch ´n Alkohooltest maken. Blot good, dat sien Frau dat Malöör betügen un upklaren kunn.
So vööl Pech harren wi neet. Wi sünd mit en Bus annerthalv Stünnen dör de Gehegen fahren un hebben mennig verscheden Deren ut de hele Welt to sehn kregen. De Apen leven daar up ´n extra Eiland un ok de Elefanten hebben en egen Beriek, de komen mit Autos neet mehr direkt in Kuntakt.
Na de Rundfahrt sünd wi noch stünnenlang dör de leep grote Deren- un Freetiedpark sluurt mit mennig Mallmöhlens, Achterbahnen, Waterrutschen un ik weet neet wat noch all. Alls hebben wi heel neet schafft un sünd tegen Avend mööi in uns Zelt gahn. De Kinner wassen Füür un Flamm för hör Butzen un Oma un Opa blied, dat se up de Bank up de Terrass vör de “Lodge“ ennelk de swaar Benen un Foten hoog leggen kunnen.
Heia un Aua Safari!
Karlheinz Harms
für den 23.07.2026
|
