|
De hunnertst Gebuursdag un de egen Memoorje
An de 17. Oktober 1926 wurr in Bremen dat Weserstadion openmaakt. Vör eenhunnert Jahren! En goden Grund, disse runn Gebuursdag besünners to fieren.
Um de hele Werder Fans wat besünners to beden, wurr de Festakt al up de 26. September vörtrucken. Daar funn en Fründskuppsspööl tüsken internationaal bekannte, froherde Spölers van Werder Bremen un de spaansk Vereen Real Madrid statt. En mooi Spektakel, de ik mi leider blot in ´t Feernsehn ankieken kunn.
Daarför harr ik anfangs van ´t Jahr en anner, besünner Beleevnis. Ik kunn mit mien Frau an en Stadionföhrung in Bremen deelnehmen. En jungen Mann hett uns twee Stünnen dör dat kumplete Stadion föhrt un uns maal achter de Kulissen kieken laten.
In de Kabienen van de Mannskuppen. Daar hett elke Spöler sien egen kittig Beriek, kann na ´t Spööl in ´n Waarmbad entspannen of ok in de bekennt Iestünn stiegen of sük masseren laten. Ok de kommodig inricht Kabien för de Schiedslüü kregen wi to sehn, un nettgliek waar, för Eten un Drinken för de Sportlers was overall good vörsörgt.
Overhoopt Eten un Drinken! Ok in de Beriek för VIP-Gasten mit rundum Köst, in de ofsloten Logen, dürsen wi kieken. Of all de Lüü, de daar mooi in d´ Warmte sitten, tüsken Happkes un Sluckjes ok maal up ´t Spöölfeld kieken, much ik haast betwiefeln. Waaranners sall dat Spröökje herkomen: Football is de mooiste Nevensaak up de Welt!?
Daarna wurren wi dör de Spölertunnel in ´t Stadion föhrt un hebben uns up de Trainerbank sett. Een Autositz tegen de anner. Un all natürelk mit Sitzheizung! Daar sitten alltied buten de Trainer noch de Co-Trainer, de Trainer för de Toorwart, för de Fitness un för de Standards, de Dokter un Physiotherapeuten, de Betreuers, Helpers un en Rummel Ersatzspölers.
Daarna gung ´t noch in ´t Werder Wuseum (heet so), dat was uns leste Statioon vör de Rückreis.
Een Week later truff ik mien oll Footballkumpel Dietmar un hebb hum van uns Stadionföhrung vertellt. Wi hebben för haast fievtig Jahr (neet to glöven!) mitnanner in een Mannskupp spöölt, villicht neet besünners good aver tominnst alltied brannerg.
Wenn man so in ´t Prootje kummt, fangt dat ja ok fell in de Memoorje an to rappeln un denn heet dat: Weetst noch, domaals bi uns? Anstööt sönndaags smörgens um teihn Ühr of froher, ok bi Winterdag. Umtrecken in holten Baracken of in ´n ollen Schaaphuck an d´ Diek, ohn Heizung un Water. Ofbrusen, entspannen un Wunnen versörgen kunnst achteran in Huus.
„Ik glööv“, simeleerde Dietmar, „so fix as wie beid domaals wassen, kunnen wi vandaag ok in en heel anner Liga spölen.“
„Dat meen ik ok, Dietmar“, muss ik lachen, „wi sünd blot vööls to froh up de Welt komen.
Karlheinz Harms
für den 08.10.2026
|
